Servisu Munisipál Agrikultura no Peska Baucau prepara grupu produtiva agrikultór hamutuk 20 atu partisipa iha feira nasionál hodi komemora loron Proklamasaun Independénsia 28 Novembru.

Vise-Prezidente ba Sub-Komisaun Organizadora atuál Diretór Servisu Munisipál Agrikultór no Peska Baucau, Moisés Lobato Perreira, esplika, feira ba 28 Novembru iha munisípiu Baucau iha aldeia Darsula, Suku Gariuai ne’ebé tuir planu sei abertura iha loron segunda (22/11). “Partisipa iha feira ba grupu lokál ne’ebé mak ita atu hatún ne’e hamutuk grupu 20,” Diretór Agrikultór Baucau ko’alia vila nova, kuarta ne’e. Kada grupu tenke reprezenta ema na’in-lima ne’ebé mai hosi grupo produtór, prosesamentu, kulinária no artezanatu ne’ebé reprezenta hosi postu administrative neen (6) no kada grupu tenke iha produtu lokál ne’ebé mak kualidade nune’e loke dalan kompete iha merkadu. “Grupu produtór sira mak hanesan produtór fós-rai metan no mean, batar, fore-mungu no seluk tán,” Moisés akresenta. Liuhosi feira ne’e fó benefisiu ba partisipante sira, tanba bele fa’an produtu lokál hanesan fós-mutin, metan no mean atubele atrai vizitante sira.