𝐁𝐚𝐮𝐜𝐚𝐮: 𝐒𝐞𝐬𝐭𝐚, 11 𝐒𝐞𝐭𝐞𝐦𝐛𝐫𝐮 2026-
Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐄. 𝐌. 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, nu’udar Prezidente Orgaun Koordenasaun Munisipal, konvoka enkontru ho Membru Konsellu Koordenasaun Munisipal Baucau iha salaun enkontru Munisipál Soi-Mali. Orden traballu ba enkontru regulár fulan Setembru nian maka hanesan:
1. Aprezenta estimativa futuras 2027 no proposta PPGs 3, 6, 10, 19, 20 no 26;
2. Proposta modelu Parseria Públiku Privadu ba Operasaun no Manutensaun Merkadu Munisipál Baucau;
3. Konfirmasaun dadus área aldeia ho kategoria: remota, muito-remota no extremamente remota;
4. Progressu ezekusaun orsamentu husi fulan Janeiru to’o Agostu 2026 no estimativa futuras 2027;
5. Progressu implementasaun projetu PDIM 2026;
6. Igualdade Jéneru no partisipasaun feto;
7. Aprezenta ezbosu sirkulár kona-ba Medida urjente ba kontrolu asu no prevensaun moras raiva iha Munisipiu Baucau.
Iha intervensaun ba abertura sorumutu Konsellu Koordenasaun Munisipál, Sua Exelénsia Prezidente Autoridade Munisipal Baucau, Dra. Veneranda E. M. Lemos Martins, hato’o agradesimentu ba lideransa komunitária sira ho partisipasaun ema hotu-hotu nian, ne’ebé lori susesu boot liu husi selebrasaun ne’ebé halo ona iha ita nia Munisípiu Baucau ho di’ak.
“Uluk na-na’in hakarak hato’o parabens ba ita boot sira katak, fulan Agostu ita selebra festa boot rua maka hanesan: (1) selebrasaun loron FALINTIL-FDTL ba dala 51 iha foho Matebian (2) selebrasaun loron konsulta populár ba dala 27 iha munisípiu Manatuto no Postu Administrativu Vemase, ita hotu nia apoiu hahú husi preparasaun to’o realiza selebrasaun loron nasionais ne’ebé konsidera susesu, tanba ne’e ita tenki agradese ba ita nia an rasik no mós ba ema hotu-hotu hotu ne’ebé fo nia tempu tomak.
Ita hotu akompaña movimentu atividade semana dahuluk fulan Setembru ne’ebé okupadu tanba ita nia Estadu Timor-Leste, Governu Sentrál no Konferensia Episkopál Timorense organiza no simu restus mortais ba preladus na’in tolu: Dom Jaime Garcia Goulart, Dom José Joaquim Ribeiro, Monseñor Martinho da Costa Lopes no Dom Alberto Ricardo da Silva. Restus mortais hirak ne’e molok haloot iha kinta-feira, 10 Setembru, iha igreja katedrál Dili sei hahú ho misa solene iha Tasi tolu ne’ebé prezide husi *Sua Eminénsia Cardeal Dom Virgílio do Carmo da Silva, SDB, Arsebispo Metropolitana Dili .”
Prezidente Autoridade Munisipál hatutan, materia aprezentasaun husi Sekretáriu Munisipál Administrasaun no Finansas ne’e importante tebes tanba tinan ne’e Ministériu Finansas hahú aplika mudansas metodolójia foun, tinan sira ba kotuk bolu *Komisaun Revizaun Orsamentu (KRO)* no Tinan ne’e hanaran *Komisaun Revizaun Polítika (KRP)* , materia ne’e tulun hodi fo koñesimentu ba membru konsellu sira hotu kona-ba saida maka Estimativa Futuras (EFs) no saida maka programa Prioridades Polítika Governu (PPGs) no entidade saida maka involve iha kada PPG ba elaborasaun proposta. Iha ita nia enkontru ohin ne’e mós sei fo aprovasaun ba sirkulár kona-ba *Medida urjente ba kontrolu asu no prevensaun moras raiva iha Munisipiu Baucau* , hafoin ita fo aprovasaun ekipa Task force RAIVA utiliza hodi kombate moras raiva iha ita nia munisipál Baucau. Tanba ne’e, husu atu membru konsellu sira hotu tau atensaun hodi partisipa ho di’ak no ativu iha diskusaun.
Remata aprezentasaun membru Konsellu Koordenasaun Munisipál halo diskusaun ba materia ne’ebé aprezenta husi Sekretáriu Munisipál, Diretóra Nasionál, Diretóra Servisu Munisipál Finansas, Diretór Servisu Munisipál Planeamentu Integradu no Dezenvolvimentu, Pontu Fokál SEII no Asesór Jurídiku. Nune’e Sua Exelénsia Prezidente Konsellu Koordenasaun Munisipál ho Membru Konsellu sira fó apresiasaun no pareser liu husi diskusaun molok fo aprovasaun liu husi votasaun.
