Baucau: Segunda-feira, 27 Jullu 2026-
Sekretáriu Munisipál Administrasaun no Finansas lidera enkontru hodi divulga Sirkulár Preprasaun Orsamentu númeru 2 no distribui Estimativa Futuru ba Diretivas Servisu Munisipál inklui Administradór Postu Administrativu.
Sekretariu Munisipál Administrasaun Finansas Señór Juvenal Daniel Filipe Belo, fo sai konvokatóriu iha semana kotuk hafoin hola parte iha sesaun traballu ne’ebé organiza husi Ministériu Finansas kona-ba prienximentu formuláriu proposta PPGs no Costing PPGs.
Durante divulgasaun Sirkulár Preparasaun Orsamentu nú. 2, Sekretátiu Munisipál ADFIN iha nia intervensaun hatete katak “Hametin orsamentu bazeia ba polítika governu hodi garante sustentabilidade fiskál, nune’e Estimativas Futuras serve hanesan baseline. PPGs (Prioridade Polítika Governu) maka mekanizmu úniku despezas foun sira. Kálkulu obrigatóriu ba kustus plurianuál no indikadores dezempeñu integradu.” Nia hatutan Sirkulár la hatete kona-ba orsamentu adisionál hanesan tinan anteriór, ba tinan 2027 bainhira iha programa foun via úniku maka PPGs.
Governu aprova PPGs hamutuk 28 no munisípiu sira foku ba PPGs 12, PPGs 20 no PPGs 26, tuir orientasaun husi Ministériu Finansas ba entidades envolvidu kada PPGs sei prepara proposta konjunta no sei defende mós konjunta durante sesaun KRP (Komisaun Revizaun Polítika), tanba ne’e husu ba Diresaun sira hadi’a kualidade dadus, lee dokumentu estratéjiku sira hanesan PED 2011-2030, Programa Governu, PMOT, PDM no PDK. Proposta OJE 2027 nafatin garantia kualidade di’ak, inkluzivu, reziliente, transparente no responde ba nesesidade komunidade.”
Enkontru koordenasaun ne’e lidera husi Sekretáriu Munisipál ADFIN akompaña husi Sekretáriu Munisipál Planeamentu Investimentu no Dezenvolvimentu Intergradu Señór Eduardo Filipe Ximenes Belo, Xefe Gabinete PAM, Diretór Ajensia Planeamentu Munisipál no Asesór PARTISIPA. Enkontru ne’e hola parte husi Diretivas Servisu Munisipál, Administradór Postu Administrativu na’in 8 inklui téknikus. Remata sesaun ne’e Diretóra Servisu Munisipál aprezenta orsamentu Estimativa Futuras ne’ebé simu husi Ministériu Finansas no halo mós simulasaun ba prienximentu Aneksu C no proposta foun PPGs iha Aneksu B.
Tuir orientasaun husi Ministériu Finansas katak loron 9 fulan Agostu tinan 2026 konsidera nu’udar data ikus ba submisaun Proposta PPGs no ajustamentu Estimativa Futura nune’e fo loron sanulu hahú husi 10 – 20 Agostu 2026 fo biban ba Ministériu Finansas halo validasaun téknika ba kustus molok entidade orsamentál sira. Tuir kalendáriu sesaun ba Komisaun Revizaun Polítika sei akontentese iha 18 – 30 Agostu 2026.