𝐁𝐚𝐮𝐜𝐚𝐮: 𝐓𝐞𝐫𝐬𝐚 17 𝐍𝐨𝐯𝐞𝐦𝐛𝐫𝐮 2026 –

Exelénsia PAM Baucau , 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬,nu’udar mós Prezidente Konsellu Konsultivu Munisipál, konvoka enkontru extra-ordinária ho membru orgaun konsultativu hodi diskute kona-ba ezbosu dezeñu logótipu Munisípiu Baucau no proposta Loron Fundasaun Baucau 20 Abríl. Enkontru ne’e konvoka tuir inisiativa própria Prezidente, bazeia ba Diploma Ministeriál nú. 51/2016, 30 Setembru.

Iha abertura, Prezidente KKM hato’o sentimentu tristeza tanba lakon membru dezignadu orgaun konsultativu husi reprezentasaun grupu akadémiku, saudozu mestre José Viegas ne’ebé durante ne’e ativu no kontribui ideia konstrutivu ba dezenvolvimentu Baucau. Prezidente Autoridade Munisipál Baucau ne’e mós hato’o apresiasaun ba kooperasaun husi Autoridade Komunitária inklui entidade relevante sira durante Loron Finadu, ne’ebé kontribui ona paz no seguransa iha teritóriu munisípiu Baucau. Nia mós rekoñese esforsu ekipa Guarda Florestál no Autoridade Protesaun Sivil (APC) ne’ebé responde ba kazu inséndiu iha área Foho Matebian, iha tempu ne’ebé estadu fo atensaun ba alterasaun klimátika hanesan El Niño maibe autór deskoñesidu balun sunu rai ne’ebé halo estragus ba ai-horis no hamate balada fuik sira.

Prezidente salienta katak logótipu ne’ebé aprezenta nu’udar ezbosu de’it, la’ós versaun finál no konvida membru konsellu sira atu fó hanoin inovativu, konstrutivu no inkluzivu hodi logótipu ne’e reflete valór istóriku, kulturál, ekonómiku no sosiál tuir identidade Baucau no reprezenta aspirasaun ba futuru munisípiu nian. Nia hatutan _“Loron Fundasaun Baucau, proponente husi Prezidente Kámara Komérsiu Industria – Munisípiu Baucau, ita selebra tiha ona maibe hakarak ofisializa nune’e lori materia ida ne’e mai diskute klean liu iha orgaun ida ne’e hodi rona hanoin no halo konfirmasaun ba legalidade, nune’e rezultadu husi enkontru loron ohin nian sei enkamiña ba Sua Exelénsia Ministru Administrasaun Estatal hodi halo análiza.”_

Molok halo abertura ba enkontru extra-ordinária, Prezidente informa katak grupu komunitária sei reprezenta munisípiu Baucau iha feira nasionál ba komemorasaun loron proklamasaun Independénsia 28 Novembru dala-51, sei lori produtu lokál, kulinária no vestuária tradisionál hodi kompete iha nivél nasionál. Parte seluk Juventude desportiva Baucau oan sira mós sei kompete iha FND ho modalidade oin-oin. Nune’e Prezidente apela ba Baucau oan hotu atu suporta no fó motivasaun tanba sira hotu lori Baucau nia naran, tuir lema “Baucau ha’u nian, Baucau Ó nian, Baucau ita hotu nian.”

#Média

#GAT PAM BAUCAU 2026

© 2026 Autoridade Munisípiu Baucau