Baucau, 09 Abril 2026
Servisu Munisipál Apoiu Organizasaun Naun-Governamental no Organizasaun Komunitaria (Sigla Portugués, SM-AONGeOC) mak servisu Autoridade Munisipál ne’ebé ninia misaun atu asegura apoiu tékniku no administrativu ba Prezidente Autoridade Munisipál ba órgaun no servisu sira seluk Autoridade Munisipál nian iha estudu, dezenvolvimentu no ezekusaun estratejia sira hodi apoia no hametin organizasaun naun-governamental no organizasaun operasionál komunitária sira iha Munisípiu no atu fó apoiu ba atividade interese públiku ne’ebé sira hala’o.
Diresaun Servisu Munisipál Apoiu Organizasaun Naun-Governamental no Organizasaun Komunitaria hametin ona amizade ho sosiedade sivíl liu-husi enkontru koordenasaun hodi atualiza servisu públiku no fornesimentu dadus inserta ona iha dokumentu ofisiál hanesan Planu Dezenvolvimentu Munisipál 2025 – 2030.
Obejtivu prinsipál husi Sesaun Traballu ida-ne’e mak:
- Hadia koordenasaun no hametin partisipasaun sosiedade sivíl hodi kontribui ba planeamentu inkluzivu iha nivél Munisipál;
- Identifika dezafiu prinisipál iha área Saúde, edukasaun inkluzivu, infraestrutura asesivél no atendimentu públiku iha Balkaun Úniku inklui programa sira seluk;
- Rekolla proposta atividade husi organizasaun feto no organizasun Ema ho Defisiensia;
- Garante integrasaun igualidade jéneru no inkluzaun sosiál iha Planu Asaun Anuál 2027 Autoridade Munisipál Baucau.
Molok tama ba faze aprezentasaun no diskusaun, iha intervensaun no loke abertura husi Sekretária Munisipál ASeO, 𝐒𝐫𝐚. 𝐌𝐚𝐫𝐢𝐚 𝐂. 𝐕𝐢𝐞𝐠𝐚𝐬.
Iha sesaun aprezentasaun hahú husi Servisu Saúde inkluziva hodi aprezenta kona-ba difikuldade barreira fizika no komunikasaun atendimentu saúde espesifiku, mediku espesialista tuir tipu difisiénsia hanesan: mentál, matan no tilun hodi fasilita atestadu médiku ba Ema ho Defisiénsia.
Aprezentasaun husi Diretór Servisu Munisipál Edukasaun kona-ba asistensia ba estudante sira liu-liu asesu ba nivel ensinu iha barreira fizika no aprendizajen ba materia eskolár inkluzivu.
Aprezentasaun husi Koordenadór INSS Baucau, kona-ba sensibilizasaun ba seguransa sosiál ba grupu Vulnerável
Aprezentasaun husi Diretór Servisu Munisipál PNDS, kona- ba lista prioridades komunidade husi tinan 2025-2026.
Sesaun traballu ne’e nu’udar meiu aprendizajen hodi halo diagnóstiku ka análiza kona-ba problema komunidade liu-liu iha infreastrutura públiku no inkluzividade iha área 𝐒𝐚𝐮́𝐝𝐞 𝐧𝐨 𝐄𝐝𝐮𝐤𝐚𝐬𝐚𝐮𝐧. Nune’e mos sei haforsa armonizasaun entre Autoridade Munisipál Baucau no Sosiedade Sivíl hodi haree atividade konkretu ba planu Asaun Anúal.
Tanba ne’e sesaun traballu Autoridade Munisipál Baucau sei simu rekomendasaun husi Sosiedade Sivil kona-ba servisu Públiku Inkluzivu nian.
Fasilitadór sira ba Sesaun ne’e mak Diresaun Servisu Munisipál Apoiu Organizasaun Naun-Governamental no Organizasaun Komunitaria no hetan Apoiu husi Asesór Dezenvolvimentu Munisipál – PARTISIPA koordena ho pesoál xave ba sesaun traballu ne’e rasik. Sesaun ne’e mos fasilita husi: Sekretária Munisipál Asuntu Sosiál no Organizasaun; Ekipa Gabinete Apoiu Téknika PAM Baucau; Ekipa Diresaun SM-AONGeOC.
Remata.
Portal Munisipál Baucau