𝐁𝐚𝐮𝐜𝐚𝐮: 𝐒𝐞𝐬𝐭𝐚, 27 𝐅𝐞𝐯𝐞𝐫𝐞𝐢𝐫𝐮 2026-
Sua Exelénsia Ministru Planeamentu Investimentu no Estratégiku (MPIE) Eng. Gastão Francisco de Sousa, akompaña husi Sekretariu Estadu Dezenvolvimentu lokál (SEDL) Sr. Mateus W. Santos Tallo ho Exelénsia Prezidente Autoridade Munisipál Baucau Dra. Veneranda E. M. Lemos Martins, lansa Projetu Planu Usu do solo Urbana iha Munisípiu Baucau.
Diskursu Exelénsia Prezidente Autoridade Munsipál Baucau, Dra. Veneranda E. M. Lemos Martins, hateten ohin loron, ita hotu mai hamutuk iha fatin Ida ne’e atu marka momentu importante ida ba ita nia Munisipiu Baucau. Ita sei hasasin estabelesementu grupu traballu lokál ne’ebe sei sai hanesan motor Prinsipál ba implementasaun Planu Usu Solu Urbanu, Munisípiu Baucau.
Projetu PLANU USU SOLU URBANU ne’e la’ós deit hanesan planu dezenvolvimentu urbanu ida deit, maibé nia hanesan dalan ida atu ita hotu bele dezenvolve sidade Baucau ho di’ak liutan. Nia objetivu prinsipál mak atu garante katak Sidade Baucau bele sai hanesan fatin ne’ebé di’ak tebes atu hela, atu servisu, no mós atu dezenvolve ekonomia ho sustentável. Ita hotu hatene katak Baucau nia dezenvolvimentu presiza tebes planu ne’ebé klaru no estratéjia ne’ebé forte atu bele alkansa rezultadu ne’ebé di’ak ba futuru
Iha planu ne’e, ita sei haree ba aspetu barak hanesan:
- Oinsá atu organiza rai atu bele uza ho di’ak no efisiénte liu.
- Oinsá atu fasilita ema atu bele lao no transporte iha sidade laran ho di’ak.
- Oinsá atu garante katak ema hotu bele asesu ba bee moos, saneamentu, eletrisidade, eskola, no ospitál.
- Oinsá atu proteje no prezerva ita nia ai-hun no fatin importante sira ne’ebé iha valór kulturál.
- Oinsá atu kria empregu no dezenvolve ekonomia ne’ebé forte no sustentável.
6.Oinsá atu redús impaktu negativu ba ambiente, - Onsá atu halo ambiente moris no komunidade sai di’ak liu tan.
Atu alkansa objetivu sira ne’e, involvimentu husi komunidade lokal sira importante tebes. Ita hirak ne’ebé ohin halibur iha ne’e, mak sei sai hanesan “mata dalan” no “lian” ba ita nia komunidade iha prosesu planu ne’e.
Grupo Traballu Lokal ne’ebé ita sei estabelese ohin sei iha responsabilidade boot atu fó input, fó hanoin, no mós atu ajuda implementa planu ne’e iha nível lokal. Sira nia kontribuisaun sei importante tebes atu garante katak planu ne’e bele responde ba nesesidade no prioridade husi komunidade sira iha Baucau.
Tanba ne’e, hodi Autoridade nia beran, hakarak husu ba imi hotu atu partisipa ho aktivu iha diskusaun sira. Fó imi nia hanoin, fó imi nia suzestau., no mós fó imi nia preokupasaun sira. Tanba ita hotu iha responsabilidade atu dezenvolve Sidade Baucau ba futuru ne’ebé di’ak liu. Nune’e, ho Kbi’it nai Maromak nian no mós ho espritu Eroi no Eroina sira nian ha’u deklara loke
ofisialmente sesaun estabelesimentu Grupu Traballu Lokal ba projetu PLANU USU SOLU URBANU ba Sidade Baucau.
Atividade partisipa husi Membru Governu balum Diretor Nasional, Sekretáriu Munisipál Diretóres Munisipais, Diretor Delegasaun Territorial, Partidus Politikus, Prezidente CCI-Baucau, Prezidente AEMTL, Administrador Postu Baucau-Vila no Xefe Suku Sira.