Progressu konstrusaun Ensinu Sekundaria Públiku Númeru 2 Baucau hamutuk aula haat ne’ebé konstui hosi forsa naval EUA, kuarta (17/11). Imajen Tatoli /Natalino Belo.
Progresu konstrusaun na sala-haat iha Ensinu Sekundária Públiku (ESP) Númeru 2 Baucau hosi forsa navál Estadu Unida Amérika (EUA) atinje ona 80%.
Adjuntu-Diretór ESP Númeru 02 Vila Nova, Baucau, Titos Almeida, informa prosesu konstrusaun ne’e hahú iha fulan-setembru liubá ho fulan-tolu maibé kestaun Covid-19 seidauk finaliza no sei termina iha fulan-dezembru.
“Daudaun ne’e monta besi kuda-kuda, hela pinta no monta kalen, arus janela no odamatan seidauk maibé tuir planu ekipa foun, ita bele dehan pursentu 80 ona tanba hela arus, taka kalen no pinta inklui instalasaun eletrisidade,” nia ko’alia iha Vila Nova, kuarta ne’e.
Titos akresenta, apoia hosi EUA bele hakma ona ejizénsia eskola nian kona-ba limitasaun aula aprendizajen tanba totál númeru estudante hamutuk 1.003 ne’ebé utiliza de’it sala 20.
Nune’e mós fizikamente kondisaun eskola hahú estragu hanesan plafon hahú monu no kalen kuak tanba eskola refere harii iha tempu okupasaun Indonézia ne’ebé utiliza ba eskola desportu profesór (SGO, sigla Indonézia).
“Ne’e ajuda ona pelumenus hamenus ona todan ne’ebé durante ne’e eskola ne’e enfrenta,” Titos argumenta.
Dirijente eskola refere halo pedidu ka proposta ba embaixada EUA iha Timor-Leste hafoin forsa navál direitamente observa kondisaun eskola refere iha tinan 2019. Entretantu EUA aloka orsamentu ba konstrusaun eskola refere ho montante $350.000,00.