Atu hatene detaillu ba Deskrisaun Servisu ba Pozisaun Vaga Hat (4) iha leten, bele haree iha link tuir mai ne’e: https://baucau.gov.tl/oportunidade-serbisu/#, Klik iha “KONKURSU PÚBLIKU – REKRUTAMENTU FUNSIONÁRIU KAZUAIS” mak Download iha ne’eba.
𝐁𝐚𝐮𝐜𝐚𝐮: Autoridade Munisipál Baucau, liuhosi Gabinete PAM hala’o Sensibilizasaun kona-ba Podér Lokál Desentralizasaun Administrativa iha Timor-Leste liu-liu Asediu Seksuál ba Partsipasaun feto hanesan lideransa no espiritu Nasionalismu no partisipasaun Juventude nian.
Sensibilizasaun ida ne’e hala’o durante loron rua 9 -10 𝐉𝐮𝐥𝐥𝐮 2026 iha Postu Administrativu Quelicai Antigo, Matebian no Postu Administrativu Quelicai. Oradór ba Sensibilizasaun Ida ne’e husi Asesor Juridiku PAM Sr. Angenilio Dos R. Jerónimo no Bernardino O. Guterres.
Objetivu husi Sensibilizasaun ida ne’e hanesan matadalan ida hodi hasa’e koñesimentu partisipante sira nian kona-ba desentralizasaun administrativa no podér lokál nomos atu aumenta koñesimentu juventude sira liu-liu feto atu oinsa prepara an atu sai hanesan lideransa feto iha futuru. Nune’e mos atu promove diskusaun no reflesaun kona-ba importansia atu kombate Asediu Seksuál iha instituisaun Publiku sira.
𝗕𝗮𝘂𝗰𝗮𝘂: 𝗧𝗲𝗿𝘀𝗮 07 𝗝𝘂𝗹𝗹𝘂 2026-
Ministériu Administrasaun Estatál (𝗠𝗔𝗘) liuhusi Diresaun Gerál Simplifikasaun no Modernizasaun Administrasaun Lokál (DGSMAL) hamutuk ho Diresaun Gerál Dezenvolvimentu Governu Lokál (DGDGL) realiza atividade formasaun Integradu ba Autoridade Munisipál iha regiaun 1 parte leste ne’ebé kompostu husi munisípiu Baucau, Manatuto, Laútem no Viqueque.
Formasaun ne’e hala’o durante loron ha’at iha salaun SOI-MALI, ne’ebé partisipa husi Sekretáriu Munisipál Planeamentu Investimentu Dezenvolvimentu Intergradu sira no Diretór Servisu Munisipál sira.
Formasaun ne’e abertura husi Sua Exelénsia Vise-Ministru Admnistrasaun Estatál, Jacinto Rigoberto G. de Deus, hamutuk ho Diretor Gerál Desenvolvimentu Governu Lokál (DGDGL) Sr. Antônio Guterres no Prezidente Autoridade Munisipál Baucau Dra. Veneranda E. M. Lemos Martins.
Objetivu husi formasaun ida ne’e atu hasa’e koñesementu, abilidade no kompetensia lideransa sira nian nune’e bele iha kualidade servisu ba área ida-diak ne’ebe sira jere nune’e faz-parte ba preparasaun hodi prense kondisaun minima atu hakat ba Desentralizasaun Administrativa no Poder Lokál.
Intervénsaun husi Vise-Ministru Admnistrasaun Estatál Sr. Jacinto Rigoberto G. de Deus hateten formasaun Ida nee importante tebes ba lideransa sira hodi hasa’e sira nia kapasidade no koñesimentu kle’an nune’e sira bele halo servisu tuir lei no baze legál sira ne’ebé iha.
“Ha’u nia esperansa ba lideransa sira ne’ebé ohin loron partisipa iha formasaun ida ne’e tenke tuir ho di’ak ho disiplina hodi intende matéria sira ne’e ho diak nune’e wainhira fila ba nia fatin bele kompartilha fali matéria sira ne’e ba maluk sira hodi servisu ho di’ak no hetan kualidade di’ak ” hateten Vise Ministru.
Iha oportunidade Exelénsia Prezidente Autoridade Munisipál Baucau Dra. Veneranda E. M. Lemos Martins hateten importansia husi formasaun ida ne’e atu prepara ita hotu iha munisipiu sira di’ak liután ba desentralizasaun podér lokál.
Tanba ne’e husu atu partsipante sira intende didiak nune’e fila fali ba idaidak nia munisipiu bele prepara ho diak liu tan bainhira tama ba segundo avaliasaun ne’ebé ita hotu preparadu.
𝐁𝐚𝐮𝐜𝐚𝐮: 𝐊𝐢𝐧𝐭𝐚 25 𝐉𝐮ñ𝐮 2026-
Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐄. 𝐌. 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, akompaña husi Asesor Prinsipál no Asesor Jurídico, Diretór Servisu Munisipál Obras Públika no Administradór Postu-Administrativu Baucau-Vila, enkontru ho Kompañia Lokal Jova Construction Unp.LDa no Planalto Estar, Unip.Lda hodi mai informa ba Autoridade Munisipal Baucau relasiona ho preparasaun kontinúasaun ba implementasaun projetu reabilitasaun Estrada ligasaun iha área Caisidu-Caibada to’o Pouzada Vila-Antiga Baucau.
Obra ba reabilitasaun estrada ne’e husi MPIE implementa ona Estrada Caisidu to’o Aero-Portu Lanud ne’ebé iha tinan kotuk finaliza ona. Iha tinan ne’e hahu kontinuasaun reabilitasaun Estrada husi Caisido to’o rotunda Vila-Antiga Baucau ho distansia 11 KM ne’ebé sei kobre ba área husi Suku Triloka, Tirilolo, Caibada no Bahú.
𝐁𝐚𝐮𝐜𝐚𝐮: 𝐊𝐮𝐚𝐫𝐭𝐚, 24 𝐉𝐮ñ𝐮 2026-
Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐄. 𝐌. 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, fó sai konvokatóriu hodi bolu membru Orgaun Konsulta Autoridade Munisipál atu partisipa iha reuniaun ordinária Konsellu Konsultivu Munisipál.
Iha nia intervensaun, Prezidente Konsellu Konsultivu Munisipál, hatete, ita hotu sente triste tanba ita lakon Eis Gerilleiru, Eis Prezidente Asembleia Konstituente no Eis Prezidente Repúblika Demokrátika Timor-Leste, saudozu Francisco Guterres “Lú-Olo”. Husu ba membru Konsellu Konsutivu Munisipál kontinua divulga informasaun ba komunidade hotu atu kumpri Dekretu Governu Nú. 6/2026 kona-ba Lutu Nasionál.
Dekretu Governu ne’e hatete katak Lutu Nasionál hahú tuku 3 husi loron 22 fulan Juñu no remata iha loron 28 fulan Juñu, ho bandeira Nasionál meia-haste no proibisaun barullu iha fatin públiku.
Tuir Diploma Ministeriál Nú. 51/2016, Konsellu Konsultivu Munisipál nia misaun prinsipál:
1. Promove partisipasaun ajente lokál;
2. Akompaña formulasaun planu Autoridade Munisipál;
3. Avalia prestasaun servisu públiku.
Orgaun Konsultativu ida ne’e nia kompetensia maka fo pareser ba proposta no garante transparensia iha dezenvolvimentu Munisipál.
Ordem traballu Konsellu Konsultivu Munisipál ne’ebé lori ba diskusaun ho nia asuntu sira maka hanesan:
1. Proposta hanaran edifísiu Salaun Apuramentu Munisipál ba Salaun Enkontru Munisipál Soi-Mali;
2. Implementasaun sistema SIP-Progresu Estrada Rurál 2019–2025, inklui lista empreza lokál ba tinan 2026;
3. Prevensaun rabies no kazu raiva iha Munisípiu Baucau;
4. Sensibilizasaun kona-ba Seguransa Sosiál;
5. Progresu kooperativa BAFO Kayrala no produsaun agríkola;
6. Diseminasaun Dekretu Governu Nú. 3/2025 kona-ba subsídiu Programa Merenda Eskolár;
7. Aprezenta progresu ezekusaun orsamentu 2026 no proposta planu orsamentu 2027;
8. Planu Asaun Anuál no Lista Investimentu Munisipál 2027;
9. Diseminasaun kalendáriu Nasionál no Munisipál.
Prezidente Konsellu Konsultivu Munisipál subliña katak reuniaun ordinária importante tanba atu rona programa, halo apresiasaun no aprovasaun ba proposta direjentes munisipais. Nia mós konfirma katak orsamentu PNDS 2026, inklui Fundus Infraestrutura no Fundus Operasionál, garante transferensia 100% ba konta bankária suku, garante katak projetu bele konklui antes fulan Dezembru 2026.
Portal Transparensia hatudu katak ezekusaun orsamentu Autoridade Munisipál Baucau 2026 atinji 46.6%. Nia móstra progresu di’ak maibé presiza esforsu maka’as atu kumpri prinsipiu transparensia, akontabilidade no jestaun finansas públika.
Reuniaun ordinária Konsellu Konsultivu Munisipál Baucau loron 24 Juñu 2026 hatudu kompromisiu Autoridade Munisipál atu promove partisipasaun komunidade, kumpri lei no dezenvolve Baucau ho transparensia no unidade.
© 2026 Autoridade Munisípiu Baucau
