SEFOPE Delegasaun Teritorial Municipio Baucau
Sumáriu Dadus Estatístiku Servisu Formasaun no Empregu
Munisípiu Baucau (2023–2025)
Durante períodu 2023 to’o 2025, servisu sira iha área formasaun profesional, promosaun empregu no asisténsia laboral iha Munisípiu Baucau hatudu progresu signifikativu iha esforsu atu hasa’e kapasidade rekursu umanu no kria oportunidade servisu ba komunidade. Dadus estatístika hatudu katak programa sira ne’ebé implementa ona kontribui direta ba preparasaun força trabalho no fasilita asesu ba merkadu servisu nasional no internasional.
Iha área formasaun profesional, total 607 partisipante partisipa iha sentru formasaun no kursu sira entre tinan 2023 to’o 2025. Husi númeru ne’e, 362 mak feto no 245 mak mane. Kursu sira ho partisipasaun aas liu mak Kursu Lian Inglés (145 partisipante), Kursu Lian Korea (94 partisipante), no Customer Service (80 partisipante). Dadus ne’e hatudu katak interese komunidade aas liu ba formasaun lian estranjeira no servisu administrativu ne’ebé relevante ho oportunidade servisu iha rai liur.
Relasiona ho mobilidade trabalhador, total 179 trabalhador husi Munisípiu Baucau konsege asesu ba oportunidade servisu iha Australia, ho maioria husi Postu Administrativu Baucau Vila. Distribuisaun jéneru hatudu katak 122 mak mane no 57 mak feto. Aleinde ne’e, iha mos preparasaun kandidatu trabalhador ba Japão no Nova Zelandia, ho total 22 kandidatu ba Japão no 132 kandidatu ba Nova Zelandia, maioria iha status work ready, ne’ebé hatudu prontidaun atu integra iha merkadu servisu internasional.
Programa Auto-Empregu mos implementa atu promove iniciativa ekonomia komunidade. Durante períodu ne’e, total 7 grupo benefisiáriu ho 33 ema hetan apoiu ba atividade produtivu hanesan hortikultura, alfaiate, produsaun alimentár no servisu rental. Inisiativa ida ne’e ajuda komunidade atu kria oportunidade ekonomia lokal no aumenta renda família.
Iha área servisu públiku ba empregu, rejistu kliente hatudu katak durante tinan 2023 to’o 2025 iha milhares kliente asesu servisu orientasaun empregu, liu-liu ba servisu rai liur, formasaun profesional, no servisu rai laran. Tendénsia ida ne’e reflete interese komunidade atu aumenta kapasidade no buka oportunidade servisu ne’ebé di’ak liu.
Relasiona ho disputa laboral, rejistu kazu hatudu katak maioria kazu konsege resolve liu husi mekanizmu mediassaun no prosesu administrativu. Durante períodu ne’e, númeru kazu regista liu barak iha tinan 2024 ho 15 kazu, no maioria konsege resolve ho mekanizmu apropriadu.
Iha área orientasaun karreira ba estudante sekundaria, total 1089 estudante husi eskola oioin iha Munisípiu Baucau benefisia husi programa akonselhamentu karreira entre tinan 2023 to’o 2025. Programa ida ne’e importante atu ajuda estudante sira komprende oportunidade edukasaun no merkadu servisu iha futuru.
Ikus mai, Sentru Formasaun Lian Inglés iha Munisípiu Baucau mos produz 578 graduadu durante períodu ne’e, ho 371 mane no 207 feto. Rezultadu ida ne’e kontribui importante ba preparasaun trabalhador sira atu kompete iha merkadu servisu global.