Baucau: 29 Jullu 2026
Sekretariu Munisipál PIDI, Sr. Eduardo Filipe Ximenes ho Sekretariu Munisipál Administrasaun Finansas, Sr. Juvenal Daniel Filipe Belo no Asesor Juridiku PAM Señor Angenilio Dos R. Jerónimo hala’o enkontru ho Embaixador Inerente ba Asuntu Klimátiku, Sr. Adão Barbosa, no ekipa husi Programa UNDP iha Administrasaun Munisipál Baucau.
Objetivu prinsipál husi enkontru ne’e atu haree no diskute kona-ba dezenvolvimentu projetu Fundu Klimátiku Verde (Green Climate Fund), no mós atu halo levantamentu inisiál kona-ba preparasaun ba eventu boot ida ne’ebé sei realiza iha Munisípiu Baucau, liuliu iha Postu Administrativu Venilale. Eventu ne’e sei envolve partisipasaun husi delegasaun husi nasaun 120, inklui reprezentante husi Sekretáriu Jerál Nasoens Unidas (ONU) no doadór sira seluk.
Sekretáriu Munisipál Planeamentu, Investimentu no Dezenvolvimentu Integradu Sr. Eduardo Filipe Ximenes hato’o agradesimentu ba Sr. Embaixador no ekipa tomak ne’ebé dedika tempu vizita Baucau, hodi hala’o sorumutu Ida nee hodi diskute Kona-ba projetu Fundu Klimátiku no kooperasaun ho UNDP.
Sekretariu PIDI mos hateten projetu UNDP ne’ebé estabelese Ona iha Munisípiu Baucau ne’e projetu importante atu iha kontinuasaun, nia hatutan katak projetu ne’e iha valór importante boot no nesesita tebes atu tau matan ba komunidade lokál sira.
Autoridade Munisipál Baucau sei kontinua kopera hodi apoia Sr. Embaixador no ekipa atu bele realiza eventu boot ne’ebé planeia atu akontese iha loron 4 fulan Setembru tinan 2026.