𝐁𝐚𝐮𝐜𝐚𝐮: 𝐒𝐚𝐛𝐚𝐝𝐮, 07 𝐍𝐨𝐯𝐞𝐦𝐛𝐫𝐮 2026 –
Sua Exelénsia Ministra Edukasaun, 𝐃𝐫𝐚. 𝐃𝐮𝐥𝐜𝐞 𝐝𝐞 𝐉𝐞𝐬𝐮𝐬 𝐒𝐨𝐚𝐫𝐞𝐬, Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, hamutuk ho Embaixadora Boa-Vontade ba Edukasaun, Sra. Kirsty Sword-Gusmão no reprezentante husi organizasaun Spend It Well, Sra. Nandy Gurr, inaugurasaun Eskola Bázika Filiál 1 no 2 Iatua, Buibau Postu-Administrativu Baucau-Vil, Munisípiu Baucau.
Iha oportunidade ne’e Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, lori komunidade Iatua-Buibau nia naran agardese ba Ministeiru Edukasaun no Parseiru Dezenvolvimentu ne’ebé konsege harii eskola ida ne’e bele fó benefisiu ba estudante sira aprende ho di’ak.
“Ba servisu ne’ebé maka’as husi ministeiru edukasaun ho parseiru dezenvolvimentu, ami promete katak sei kuidadu eskola ida ne’e i husu nafatin ba ministeiru edukasaun kontinúa hala”o parseria ho duador sira atu tau matan nafatin ba setór edukasaun” dehan PAM Baucau.
Exelénsia PAM Baucau, husu ba manorin sira atu tau matan mós ba fasilidade hirak iha eskola ida ne’e, nune’e durabilidade ba tinan naruk. Nia mos enkoraja manorin no estudante sira bele iha inisiativa atu lori ai-funan oan bele kuda iha área eskola oin nune’e bele hafurak liután ambiente iha eskola nian.
Iha fatin hanesan Reprezentante Spend It Well, Sra. Nandy Gurr, hato’o ninia ksolok no satisfasaun tanba bele realiza inaugurasaun Eskola Bázika Filiál 1 no 2 Iatua, ne’ebé sai eskola númeru 31 ne’ebé organizasaun ne’e ajuda harii iha Timor-Leste.
“Ami fiar katak labarik Timor-Leste sira mak futuru nasaun nian, no ami hakarak kontinua fó apoiu ba sira. Ami mós hakarak hato’o agradesimentu ba doadór hotu-hotu ne’ebé kontribui no fó apoiu ba projetu eskola ida-ne’e. Ami husu ba manorin no estudante sira atu uza no kuidadu eskola foun ne’e ho responsabilidade, hanesan imi kuidadu imi-nia an rasik”, dehan Nandy Gurr.
Diskursu, Ministra Edukasaun hato’o katak dala ruma, bainhira haree lista eskola barak ne’ebé presiza konstrui ka reabilita, nia sente katak knaar ne’e boot tebes. Maibé, depois de partisipa iha inaugurasaun eskola sira ne’ebé harii ho apoiu husi Spend It Well, nia sente esperansa katak iha futuru besik, estudante hotu-hotu bele hetan asesu ba ambiente aprendizajen ne’ebé dignu, seguru no konfortável.
“Ami, husi Ministériu Edukasaun, hakarak hato’o obrigadu barak ba Mana Nandy no Spend It Well tanba apoiu importante ida-ne’e. Tulun ne’ebé imi fó ami labele selu fila-fali, maibé ami hein katak bainhira imi haree labarik sira kontente, imi mós sei sente kontente”, dehan Ministra.
Ministra akrexenta katak kada eskola ne’ebé Spend It Well harii iha Timor-Leste iha ninia istória no signifikadu rasik. Eskola Iatua ne’e sai eskola númeru 31 ne’ebé organizasaun Spend It Well harii iha Timor-Leste, no iha eskola seluk ida tan ne’ebé besik atu kompleta iha Rejiaun Administrativa Espesiál Oe-Cusse Ambeno (RAEOA).
Importánsia husi Inaugurasaun ne’e marka tan kontribuisaun organizasaun Spend It Well ba dezenvolvimentu infraestrutura edukasaun iha Timor-Leste.