𝐁𝐚𝐮𝐜𝐚𝐮: 𝐒𝐞𝐠𝐮𝐧𝐝𝐚, 22 𝐉𝐮𝐧̃𝐮 2026-
Exelénsia PAM Baucau Dra. Veneranda E.M Lemos Martins, akompaña husi Sekretáriu Munisipál Administrasaun no Finansas, Sekretáriu Munisipál Planeamentu, Investimentu no Dezenvolvimentu Integradu inklui Asesór Prinsipál simu audiensia no enkontru hamutuk ho Embaisada Austrália nia programa PARTISIPA.
Enkontru kortezia ne’e ho objetivu introdúz Embaisada Austrália nia programa PARTISIPA ba faze daruak nian ne’ebé sei hahú iha loron 1 fulan Jullu tinan 2026. Programa ne’e foka liu ba apoiu parseiru governu iha nivel munisipál hodi haforsa dezenvolvimentu lokál ne’ebé inkluzivu no sustentavel.
Iha okaziaun ne’e mós jerente másimu aprezenta ekipa PARTISIPA ne’ebé destaka hodi fo apoiu besik liu ba Autoridade Munisipál, ekipa ne’e kompostu husi Asesór governasaun Lokál, Koordenadór Infraestrutura Reziliente no Koordenadór Planeamentu no Orsamentu Inkluzivu.
Exelénsia Prezidente Autoridade Munisipál Baucau iha nia intervensaun hatete katak durante ne’e Asesór Governasaun Lokál PARTISIPA nia asisténsia téknika ba Autoridade Munisipál Baucau di’ak tebes ho prezensa husi ekipa tékniku na’in rua nian bele haforsa liu tan. Autoridade la presiza kontrola, ita boot sira ida-idak hetan fiar no responsavel ba servisu ne’ebé halo.
“Ita presiza asisténsia téknika ida aproriadu iha área sira hanesan PDIM no PNDS, nune’e mós iha área Planeamentu, Finansas no Aprovizionamentu. Programa PARTISIPA faze daruak ita tenki foku no prodúz buat ruma tantu, kualidade infraestrutura no mós relatóriu. Loron ida ita hotu nia mandatu sei remata no husik hela de’it maka legadu.” Tenik Prezidente Autoridade Munisipál Baucau.
Hafoin remata enkontru kortezia Embaisada Austrália nia programa PARTISIPA entrega mós relatóriu trimestrál dahuluk (Janeiru – Marsu) ba Prezidente Autoridade Munisipál Baucau.