Administradór postu administrativu Baguia, munisípiu Baucau, António dos Ramos, husu Governu sentrál kria uluk kondisaun ba iha área remota molok aplika subsídiu transporte.

Lejizlasaun ne’e husu atu ajente administrasaun públika labele lori ona transporte ba uma no tenke para iha serbisu fatin, maibé Governu sei fó subsídiu transporte ba kargu xefia sira. “Lei utilizasaun viatura ne’e ami kumpre maibé ami lamenta tanba laiha kondisaun di’ak ba funsionáriu ne’ebé serbisu iha área remota. Ha’u-nia uma mai administrasaun Baguia kilómetru hitu, ne’ebé bainhira kareta no motór Estadu rai iha serbisu fatin, dadeersan mak ha’u la’o hosi uma mai iha serbisu fatin lori oras ida ho balun. Ida-ne’e difikulta serbisu tanba maski ami iha osan transporte, maibé iha área rurál laiha transporte públiku hanesan mikrolet no taxi ne’ebé bele tula ami,” Administradór informa iha salaun Eskola Ensinu Báziku Sentrál São José Baguia, domingu ne’e. Nune’e, autoridade postu konsidera dekretu-lei ne’e di’ak tanba bandu labele utiliza viatura Estadu iha loron sábadu no domingu, ho intensaun hamenus kustu ba kombustível no manutensaun, maibé iha sorin seluk difikulta serbisu administrasaun balun tanba kondisaun iha área rurál la hanesan ho munisípiu sira. “Ami husu Governu kria uluk kondisaun ba funsionáriu sira, hafoin ita hasai lei no ema hotu bele kumpre, tanba ne’e presiza kria kondisaun ba funsionáriu sira mak pelu menus harii uma (rumah dinas) ba funsionáriu sira ne’ebé besik serbisu fatin, atu nune’e atendimentu serbisu bele másimu no di’ak,” nia sujere. Administradór dehan, ho kondisaun ne’e bainhira hirak ne’ebé uma dook hosi serbisu fatin, sei iha implikasaun serbisu tanba administrasaun hotu iha área remota maiória seidauk asesu estrada ho di’ak. Postu administrativu Baguia iha populasaun hamutuk 14.557 hosi uma-kain 2.000-resin. Antes ne’e, iha loron 14 janeiru, Ministériu Finansa (MF) liuhosi Diresaun Jerál Patrimóniu Estadu, hasai sirkulár atu ajente administrasaun públika sira tenke para véikulu Estadu iha serbisu fatin, ne’ebé ba kestaun ne’e, ekipa task force ba Kontrolu Movimentu Veíkulu Estadu sei ativamente halo kontrolu ba utilizasaun. Aleinde ne’e, Veíkulu Estadu sira ne’ebé para iha eskritóriu autoriza de’it hodi halo movimentu durante oras serbisu no la autoriza hodi jestór sira ou veíkulu operasionál lori ba uma no hosi fatin serbisu ba uma. Bainhira iha nesesidade ba kestaun serbisu durante la autoriza veíkulu Estadu sai, tenke fundamenta ho autorizasaun hosi superior. Nune’e mós, MF sei imediatamente halo sosializasaun ba kargu xefia kona-ba Rezolusaun Governu númeru 13/202, ba Jestaun no Realokasaun Veíkulu Estadu, ho despaixu hosi MF inklui Padraun Prosedimentu Operasionál, molok ekipa konjunta hosi MF, Komisaun Antí-Korrupsaun (CAC, sigla portugés) no Komisaun Funsaun Públika (KFP) halo inspesaun, konfirmasaun no rekollamentu veíkulu Estadu.