𝐁𝐚𝐮𝐜𝐚𝐮: 𝐊𝐮𝐚𝐫𝐭𝐚 17 𝐉𝐮𝐧̃𝐮 2026-
Exelénsia PAM Baucau, 𝐃𝐫𝐚. 𝐕𝐞𝐧𝐞𝐫𝐚𝐧𝐝𝐚 𝐄. 𝐌. 𝐋𝐞𝐦𝐨𝐬 𝐌𝐚𝐫𝐭𝐢𝐧𝐬, konvoka enkontru regulár ho membru Konsellu Koordenasaun Munisipál hodi diskute no avalia progresu implementasaun programa no atividade inklui ezekusaun orsamentu.
Ordem traballu enkontru orgaun koordenasaun maka hanesan:
1. Aprezentasaun progresu ezekusaun atividade sira iha Planu Asaun Anuál (indikadór dezempeñu no meta anuál) no ezekusaun orsamentu 2026 ba Programa 026 – Estradas no Pontes.
2. Aprezentasaun progresu ezekusaun atividade sira iha Planu Asaun Anuál (indikadór dezempeñu no meta anuál) no ezekusaun orsamentu 2026 ba Programa 025 – Desentralizasaun Administrativa ba Poder Lokál, liu-liu Subprograma 02502 – Desentralizasaun Administrativa, Atividade 0250214 – Apoiu ba Administrasaun Postu Administrativu Vemasse.
3. Aprezentasaun progresu atribuisaun servisu públiku sira, inklui númeru benefisiáriu pensaun no subsidiu governamentál.
4. Aprezentasaun progresu fiziku projetu BTL, e.p iha postu administrativu sira, inklui área urbana.
5. Aprezentasaun progresu atualizasaun dadus dijitál iha Portal Munisipál.
6. Divulgasaun kona-ba atribuisaun kompeténsia mai Autoridade Munisipál liu husi Kontratu Inter-Administrativu ho Ministériu Transporte no Komunikasaun, Ministériu Juventude, Arte no Kultura, Ministériu Solidariedade Sosiál no Inkluzaun, no Komisaun Anti-Korrupsaun.
7. Diseminasaun kalendáriu no alokasaun orsamentu ba selebrasaun loron nasionál no loron importante sira iha munisípiu.
Iha nia intervensaun, Prezidente Konsellu Koordenasaun Munisipál, Dra. Veneranda E. M. Lemós Martins, hateten enkontru ida ne’e importante teb-tebes tanba sei aborda asuntu estratéjiku sira relasiona ho fortalesimentu Administrasaun Públika no preparasaun ba implementasaun desentralizasaun territoriál ka poder lokál.
“ita simu ona kompeténsia no responsabilidade servisu foun sira ne’ebé Governu Sentrál transfere mai Autoridade Munisipál liu husi kontratu interadministrativu sira. Tanba ne’e, importante atu dirijente no funsionáriu sira hotu prepara an ho di’ak atu bele hala’o knaar hirak ne’e ho efisiénsia no responsabilidade.” hateten Prezidente Autoridade Munisipál Baucau.
Nia mós salienta katak prosesu transferénsia kompeténsia ne’e hatudu kompromisu Governu Sentrál atu prepara instituisaun lokál sira hodi asegura implementasaun efetiva ba desentralizasaun poder lokál iha futuru.
Exelénsia hato’o apresiasaun no agradese ba diresaun servisu munisipál sira no Administradór Postu Administrativu sira hotu tanba esforsu no servisu maka’as ne’ebé kontribui ba progresu ezekusaun Planu Asaun Anuál no orsamentu 2026.
“Liu husi servisu hamutuk ne’ebé kolektivu, ita konsege atinji taxa ezekusaun orsamentu 46.1%. Espera katak molok tama ba fulan Jullu, ita nia ezekusaun orsamentu bele atinji liu 50%. Kontinua presta ita nia dezempeñu hodi servisu maka’as nune’e povu bele sente no mehi hamutuk lori Baucau ba poder lokál.”
Molok votasaun ba aprovasaun, membru sira hato’o mós apresiasaun no rekomendasaun ba materia hirak ne’ebé aprezenta tuir orden traballu ne’ebé aprovadu. Membru efetivu orgaun kolejiál Autoridade Munisipál Baucau hamutuk 80 no membru ne’ebé prezente iha enkontru ne’e hamutuk 68.